အမျိုးသမီးတွေအတွက် မရှိမဖြစ်လိုအပ်မယ့် ဗီတာမင် နဲ့ သတ္တုဓာတ်များ
လူတစ်ယောက် ကျန်းမာဖို့အတွက် လုံလောက်တဲ့ အာဟာရတွေ ရရှိဖို့ လိုအပ်ပါမယ်။ ဒီလို ပြည့်ဝဖို့ လိုအပ်တဲ့ အာဟာရတွေထဲမှာ ဗီတာမင်တွေနဲ့ သတ္တုဓာတ်တွေကလည်း မပါမဖြစ်ပါ။
လူတိုင်းက အာဟာရ လိုအပ်တယ်ဆိုပေမယ့် ကျား/မ ကွာခြားမှုကိုလိုက်ပြီး အာဟာရလိုအပ်ချက် ကွာခြားနိုင်သလို မဖြစ်မနေ ပြည့်မီဖို့ လိုအပ်မယ့် ဗီတာမင် နဲ့ သတ္တုဓာတ်တွေလည်း ကွာခြားနိုင်ပါတယ်။ အမျိုးသမီးထုကြီး ကျန်းမာစေဖို့ မရှိမဖြစ် လိုအပ်မယ့် ဗီတာမင် နဲ့ သတ္တုဓာတ်တွေကို လေ့လာလိုက်ရအောင်လား။
အမျိုးသမီးတို့ ပြည့်မီနေဖို့ လိုမယ့် ဗီတာမင် နဲ့ သတ္တုဓာတ် အမျိုးအစားများ
အမျိုးသမီးတွေအနေနဲ့ အခုပြောပြမယ့် ဗီတာမင် နဲ့ သတ္တုဓာတ်တွေကို ပြည့်မီဖို့ လိုပါမယ်။
ကယ်လ်ဆီယမ်
အမျိုးသမီးတွေ အနေနဲ့ ကယ်လ်ဆီယမ် လုံလောက်စွာ ရရှိဖို့ လိုပါမယ်။ အထူးသဖြင့် ဆယ်ကျော်သက်ကာလကနေ အသက် ၂၀ အတွင်းမှာပါ။ ဒီကာလမှာ ကယ်လ်ဆီယမ် ပြည့်ဝမှ အရွယ်ရလာချိန်မှာ အရိုးပါးတာ၊ အရိုးပွတာလိုမျိုး အရီုးအဆစ်တွေ ထိခိုက်လွယ်တာကို ကာကွယ်တားဆီးနိုင်မှာပါ။
ကယ်လ်ဆီယမ် ပြည့်မီစေဖို့ နို့သောက်တာ၊ ဒိန်ချဉ်၊ ချိစ်၊ ကိုက်လန်၊ ပန်းဂေါ်ဖီစိမ်း စတာတွေ စားပေးပါ။
ဗီတာမင် ဒီ
ဗီတာမင် ဒီက ဦးနှောက်ဆဲလ်တွေကို ချိတ်ဆက်မှု ကောင်းစေပြီး ကိုယ်ခံအားတက်စေပါတယ်။ ကယ်လ်ဆီယမ် နဲ့ပေါင်းပြီး အရိုးသန်မာစေဖို့ ထောက်ကူပေးပါတယ်။ အသက်အရွယ်ရလာလေလေ ဗီတာမင် ဒီ လိုအပ်ချက်က မြင့်လာလေလေပါ။
ဗီတာမင် ဒီ ရရှိစေမယ့် အစားအစာတွေကတော့ ဆယ်လ်မွန်၊ တူနာ၊ ကြက်ဥ၊ ဘဲဥ၊ မှို စတာတွေပါ။
ဖောလိတ်
ဗီတာမင် ဘီတစ်မျိုးဖြစ်တဲ့ ဖောလိတ်က မျိုးဗီဇဆဲလ်တွေကို ဖြစ်ပေါ်စေပြီး သွေးနီဥဆဲလ်တွေ ကျန်းမာစေဖို့ ထောက်ကူပေးပါတယ်။ ဆယ်ကျော်သက်တွေနဲ့ အမျိုးသမီးငယ်လေးတွေမှာ ပိုပြီး လိုအပ်ချက် မြင့်ပါတယ်။ ကိုယ်ဝန်ဆောငနေချိန်မှာ ပိုလိုအပ်နိုင်ပါတယ်။ မွေးရာပါချို့ယွင်းချက် မပါအောင် ထောက်ကူပေးနိုင်ပါတယ်။
ဖောလိတ်ကို ဟင်းနုနွယ်၊ ကညွတ်၊ ပန်းဂေါ်ဖီစိမ်းစတာတွေကို စားပေးပါ။
သံဓာတ်
သွေးနီဥဆဲလ်သစ်တွေ ဖြစ်ပေါ်စေဖို့ ထောက်ကူပေးပါတယ်။ ခန္ဓာကိုယ်က တစ်ရှူးတွေဆီ အောက်ဆီဂျင်ရောက်ရှိစေဖို့ ထောက်ကူပေးပါတယ်။ သွေးအားနည်းရောဂါ မဖြစ်အောင် ကာကွယ်ပေးနိုင်ပါတယ်။
သံဓာတ်ကို အသည်း၊ အမဲသား၊ ကြက်သား၊ တူနာငါး၊ ပဲအမျိုးမျိုး၊ ပဲပြား၊ ဟင်းနုနွယ်၊ စပျစ်သီးခြောက်တို့ကနေ ရရှိနိုင်ပါတယ်။
ဗီတာမင် စီ
အမျိုးသမီးတိုင်းအတွက် မရှိမဖြစ် လိုအပ်တဲ့ အင်တီအောက်ဆီးဒင့် တစ်မျိုးပါ။ ဖရီးရက်ဒီကယ်တွေကြောင့် ထိခိုက်တာမျိုး မဖြစ်အောင် ကာကွယ်ပေးသလို နာတာရှည်ရောဂါတွေ ပိုးဝင်တာတွေနဲ့ အရေပြားပြဿနာတွေ မဖြစ်အောင် ကာကွယ်ပေးပါတယ်။ ကော်လာဂျင် ထွက်ရှိစေပြီး အရေးအကြောင်းဖြစ်တာ အသားခြောက်တာတွေ မဖြစ်စေဖို့လည်း ကာကွယ်ပေးပါတယ်။
ဗီတာမင် စီ ကြွယ်ဝစေဖို့အတွက် ငရုတ်ပွ၊ ကီဝီသီး၊ လိမ္မော်သီး၊ စပျစ်သီး၊ သခွားမွှေး၊ စတော်ဘယ်ရီ၊ ဂေါ်ဖီထုပ်၊ အာလူး၊ ခရမ်းချဉ်သီး စတာတွေကို စားပေးပါ။
ဗီတာမင် B12
အာရုံကြောဆဲလ်တွေနဲ့ သွေးဆဲလ်တွေ ကျန်းမာစေဖို့ ထောက်ကူပေးပါတယ်။ ခန္ဓာကိုယ်က အသက်ကြီးလာလေလေ ဗီတာမင် B12 လိုအပ်ချက် မြင့်လာလေလေပါ။ ဒါကြောင့် ကျန်းမာချင်ရင် ဖြည့်တင်းဖို့ လိုပါမယ်။
ဗီတာမင် B12 ပြည့်ဝစေဖို့ အမဲသား၊ ဝက်သား၊ ကြက်သား၊ ငါး၊ နို့၊ ဒိန်ချဉ်၊ ဘဲဥ၊ ကြက်ဥစတာတွေ စားပေးပါ။
အိုင်အိုဒင်း
သိုင်းရွိုက်ဟော်မုန်း ထွက်ရှိစေဖို့ ခန္ဓာကိုယ်က အိုင်အိုဒင်းကို အသုံးပြုရပါတယ်။ ကိုယ်တွင်းဇီဝဖြစ်စဉ်ကို ကောင်းမွန်စေပြီး ကိုယ်ဝန်ဆောင်ချိန်မှာ သန္ဓေသားဖွံ့ဖြိုးစေဖို့ ထောက်ကူပေးပါတယ်။ ကိုယ်ဝန်ဆောင်ချိန်မှာ ပိုမို လိုအပ်နိုင်ပါတယ်။
အိုင်အိုဒင်းကို ငါး၊ နို့၊ ဒိန်ချဉ်၊ ချိစ်၊ ရေညှိ၊ နှံစားသီးနှံတွေကနေ ရရှိပါတယ်။ နောက်ထပ်အလွယ်တကူရရှိနိုင်တာ အိုင်အိုဒင်းဆား ကနေပါ။
မဂ္ဂနီဆီယမ်
သွေးတွင်းသကြားဓာတ် နဲ့ သွေးပေါင်ချိန်ကို ထိန်းညှိပေးတဲ့ သတ္တုဓာတ်ပါ။ နှလုံးရောဂါ နဲ့ ဆီးချိုရောဂါတွေကို ကာကွယ်ဖို့ရော သက်သာစေဖို့ပါ စားပေးလို့ ရပါတယ်။
မဂ္ဂနီဆီယမ်ကို ဟင်းနုနွယ်၊ နှံစားသီးနှံတွေ၊ ပဲအမျိုးမျိုး၊ အခွံမာသီးတွေကနေ ရရှိနိုင်ပါတယ်။
ရေးသားသူ - မွန်မွန်